hua chale ya ruke ḳhushnuma saman ho jaa.e
ye saat rang ka anchal jo badban ho jaa.e
sulag raha huun ka.i din se apne kamre men
daricha kholun to duniya dhuan dhuan ho jaa.e
badal ke naam suna rakkhi hai use har baat
ye ek baat bata duun to raz-dan ho jaa.e
main apne aap ko chhoḌ aaya huun kahin pichhe
kuchh aur tez chalun main to karvan ho jaa.e
yahin kahin vo mire saath tha main sochta huun
yahan ghaḌi do ghaḌi koi sa.eban ho jaa.e
ye intishar hai tartib-e-nau na jaan ise
ki ka.enat ki har shai yahan vahan ho jaa.e
sarishk-e-gham ko tabassum ki siip men rakhiye
ki raaz raaz rahe hal-e-dil bayan ho jaa.e
paron pe titli ke paigham likh ke bhejun main
hava ka jhonka kisi din ḳhabar-rasan ho jaa.e
jahan ki riit hai kohram machne lagta hai
kisi ko ishq ho ya marg-e-na-gahan ho jaa.e
abhi to jism mira dhuup ki amaan men hai
para.e saa.e men aa kar na be-aman ho jaa.e
hai is jahan ki har baat aam si lekin
jo sachche sher men Dhal jaa.e dastan ho jaa.e
Leave a Reply