sadgi yuun azma.i ja.egi
nit-na.i tohmat laga.i ja.egi
jagte guzri hai saari zindagi
ab hamen lori suna.i ja.egi
soch ka rauzan bhi aḳhir kyuun rahe
raushni ye bhi bujha.i ja.egi
sab purane ghar gira.e ja.enge
ik na.i duniya basa.i ja.egi
dauḌ hogi aur vo bhi shauqiya
dhuul basti men uḌaa.i ja.egi
asman ko bhi na baḳhsha ja.ega
chand par kalak laga.i ja.egi
ye jazira tab hamen apna.ega
jab har ik kashti jala.i ja.egi
Leave a Reply