mire jigar ki taab dekh ruḳh ki shikastagi na dekh
fitrat-e-ashiqi samajh qismat-e-ashiqi na dekh
aur nazar vasi.a kar pesh-e-nigah hi na dekh
maut men DhunD zindagi ziist men nisti na dekh
jaise har ik nafas nafas nok-e-sinan liye hue
ishq ka ḳhvab dekh le ishq ki zindagi na dekh
main to sara-e-shauq men dil ka kanval jala chuka
ab ye tiri ḳhushi ki tu dekh ki raushni na dekh
ek usuul yaad rakh salik-e-rah-e-zindagi
naqsh-o-nigar-e-dahr dekh muḌ ke magar kabhi na dekh
apni nigah pher le haan ye mujhe qubul hai
rakh miri aarzu ki sharm-e-shauq ki bebasi na dekh
tujh pe ayaan hai raz-e-dil jaan ke bin na be-ḳhabar
ma.ani-e-ḳhamushi samajh surat-e-ḳhamushi na dekh
‘mulla’ ye kya laga liya dil ko hansi hansi men rog
baat bata rahe the jo ho ke rahi vahi na dekh
Leave a Reply