Mere Jigar Ki Tab Dekh ruKH Ki Shikastagi Na Dekh

mire jigar kī taab dekh ruḳh kī shikastagī na dekh

fitrat-e-āshiqī samajh qismat-e-āshiqī na dekh

aur nazar vasī.a kar pesh-e-nigāh hī na dekh

maut meñ DhūñD zindagī ziist meñ nīstī na dekh

jaise har ik nafas nafas nok-e-sināñ liye hue

ishq kā ḳhvāb dekh le ishq kī zindagī na dekh

maiñ to sarā-e-shauq meñ dil kā kañval jalā chukā

ab ye tirī ḳhushī ki tū dekh ki raushnī na dekh

ek usuul yaad rakh sālik-e-rāh-e-zindagī

naqsh-o-nigār-e-dahr dekh muḌ ke magar kabhī na dekh

apnī nigāh pher le haañ ye mujhe qubūl hai

rakh mirī aarzū kī sharm-e-shauq kī bebasī na dekh

tujh pe ayaañ hai rāz-e-dil jaan ke bin na be-ḳhabar

ma.anī-e-ḳhāmushī samajh sūrat-e-ḳhāmushī na dekh

‘mullā’ ye kyā lagā liyā dil ko hañsī hañsī meñ rog

baat batā rahe the jo ho ke rahī vahī na dekh

Leave a Comment