un se har haal men tum silsila-jumban rakhna
kuchh madava-e-gham-e-gardish-e-dauran rakhna
apne qaabu men zara gesu-e-pechan rakhna
raas aata nahin duniya ko pareshan rakhna
is andhere men bhatak jaaen na yaden un ki
apni mizhgan pe charaghon ko farozan rakhna
aj-kal bikte hain bazar men insan ke zamir
tum ho insan to phir vaqat-e-insan rakhna
daagh dil ke hain salamat to koi baat nahin
tirgi laakh sahi sub.h ka imkan rakhna
mausam-e-shahr-e-nigaran ka koi thiik nahin
gosha-e-dil men koi atish-e-sozan rakhna
tum se sach puchho to itni hai guzarish meri
apne ‘afsar’ ko khizan men bhi ghazal-khvan rakhna
Leave a Reply