sach to ye hai be-jagah rabt in dinon paida kiya
soch hai har dam yahi ham ko ki ham ne kya kiya
vo gaya uTh kar jidhar ko main adhar hairan sa
us ke jaane par bhi kitni der tak dekha kiya
meri aur us shoḳh ki sahib-salamat jo hui
sabr o taqat ne kaha lo ham ne to mujra kiya
sair-e-gul karta tha vo aur aah betabi se main
har taraf gulshan men juun ab-e-ravan dauḌa kiya
jab talak karte rahe mazkura us ka mujh se log
ji men kuchh socha kiya main aur dil dhaḌka kiya
dard-e-dil kahna mira shayad ki us ne sun liya
varna kyuun mujh ko dharata hai bhala achchha kiya
dam-ba-dam hasrat se dekhun kyuun na su-e-charḳh main
us ne auron ka kiya us ko hamen jis ka kiya
dil mile par bhi milap aisi jagah hote rahe
jo idhar taḌpa kiye ham vo udhar taḌpa kiya
mil ga.e the ek baar us ke jo mere lab se lab
umr bhar honTon pe apne main zaban phera kiya
bas ki hai vo shohra-e-afaq us ke vaste
ye dil-e-divana kis kis shaḳhs se jhagḌa kiya
sozish-e-dil kya kahun main jab talak jiita raha
ek angara sa pahlu men mire dahka kiya
ishq-bazi men kaha ‘jur.at’ ko sab ne dekh kar
ye aziiz apni hamesha jaan par khela kiya
Leave a Reply