Wali Alam Shaheen
palkon se apne bhule hue ḳhvab bandh len
jab Thaan li safar ki to asbab bandh len
sahil pe koi ghol na us par jhapaT paḌe
DhunDa hai jo ḳhazina tah-e-ab bandh len
is aḳhiri nazare ko gar apna bas chale
har shai ki dauḌ se dil-e-be-tab bandh len
jiina to hai zarur magar apne ird-gird
kyuun ik hisar-e-gumbad-o-mehrab bandh len
yuun ho ki aarzu na ubhar paa.e phir kabhi
dil ke lahu se rishta-e-girdab bandh len
shane se ab sarakne lagi hai salib-e-gham
ruk kar zara bikharte hue ḳhvab bandh len
minha kuchh aise apni hi tahrir se hue
jo bach raha hai ab vahi asbab bandh len
‘shahin’ us ki nazr karenge ḳhiraj-e-dil
shiraza-e-junun men naya baab bandh len
Leave a Reply