Om Prabhakar
bhula-bisra vaqt phir mehman hai
phir vahi angan vahi dalan hai
ek kamra hai kahin jis men nihan
mere bachpan ka sar-o-saman hai
but-kade men jo bhi hai patthar ka hai
aur patthar ka ḳhuda insan hai
be-tarah mushkil hai tujh ko dekhna
sochna lekin baḌa asan hai
jal uTha kyun-kar mire dil ka charagh
jab ki salon se ye ghar viran hai
kab tujhe bhula nahin yaad aa raha
haan tire hone ka mujh ko dhyan hai
Leave a Reply