Shakeeb Rizvi
nashtar-e-gham jo rag-e-jan men utar jaata hai
aur kuchh hausla-e-shauq nikhar jaata hai
haal bimar ka kuchh Thiik nahin hai shayad
jo bhi aata hai dabe paanv guzar jaata hai
ehtiyat un ko sar-e-bazm na mil jaa.e nazar
aur mujhe gham hai ki namus-e-nazar jaata hai
rahrav-e-rah-e-mohabbat ka sahara hai yahi
gham jo jaata hai to saman-e-safar jaata hai
fitna-e-dair ho ya zulf-e-pareshan-e-butan
jo bhi ilzam hai divane ke sar jaata hai
mera afsana-e-gham tere taghaful ke tufail
rang laata hai nikharta hai sanvar jaata hai
us ki mahfil se chale aa.e ana le ke ‘shakeb’
dekhiye ab dil-e-ḳhuddar kidhar jaata hai
Leave a Reply