Poet
be-chargi-e-dosh hai aur bar-e-garan hai
iz.har pe pabandi hai aur munh men zaban hai
hota hai yahan roz mire dard ka sauda
ai tegh-ba-kaf roz-e-mukafat kahan hai
azad karo ḳhuun ko bazar men laao
sadiyon se ye mahkum ragon hi men ravan hai
haan rang-e-baharan hai magar us ke lahu se
jo dast-ba-dil mohr-ba-lab dard-ba-jan hai
har samt hai bazar khula hirs-o-havas ka
har shahr men har kuche men vaa.iz ki dukan hai
kal kis ko zaban band karoge zara socho
kal dekhoge ham ko ki zaban hai na dahan hai
kis shahr-e-ḳhamoshan men chale aa.e hain ham log
ne zor-e-sinan hai na kahin shor-e-fughan hai
har dard ki had hoti hai yuun lagta hai jaise
is dard ka koi na zaman hai na makan hai
Leave a Reply