Gopal Mittal
mujh pe tu mehrban hai pyare
ye bhi ik imtihan hai pyare
ye tira astan jalva hai
mere dil ki bhi shaan hai pyare
kaun kahta hai bevafa tujh ko
kis ke munh men zaban hai pyare
ashiqi aur shikva-e-bedad
ye tujhe kya guman hai pyare
tere kuche ka vaah kya kahna
ye zamin asman hai pyare
hai fasana agar jahan to ishq
is fasane ki jaan hai pyare
tu salamat rahe tire dam se
dil ki duniya javan hai pyare
haa.e vo dastan-e-gham jis ki
ḳhamushi tarjuman hai pyare
dil ki betabiyon ka haal na puchh
ek aafat men jaan hai pyare
ham bhi urdu pe naaz karte hain
ye hamari zaban hai pyare
Leave a Reply