sanvle jism ki har qaus men lahrata hai
muskurati hui shamon ka salona jaadu
raqs karti hai tire husn ki raanai men
vadi-e-najd ke jhonkon ki lajili ḳhushbu
ye tire dosh pe bal kha ke bikharti zulfen
jaise maabad men sulagte hue sandal ka dhuan
jaise maghmum musavvir ke siyah-posh ḳhayal
jaise mauhum jaziron ki chhabeli pariyan
tu vo barsat ki ghanghor ghata hai jis men
ek kaifiyat naghmat chhupi baithi hai
dudhiya husn se ukta ke miri nazron ne
jab bhi dekha hai tire rang ka bharpur nikhar
guunj uthi zehn men udte hue bhanvaron ki sada
rach gai ruuh men gaati hui koyal ki pukar
kaun hai jis ne tira zikr na chheda ho kabhi
ab to har bazm ka hai ek hi mauzu-e-suḳhan
koi deta hai laqab laila-e-be-mahmil ka
koi kahta hai tujhe pyaar se kaali nagin
kaun sa lafz tire vaste ijad karun
sochta huun tujhe kis naam se main yaad karun