Nihal Rizvi
gher kar jur.at-e-inkar talak le aa.e
log ham ko rasan-o-dar talak le aa.e
ham ko un par hi bharosa tha jo aksar ham ko
de ke phulon ki qasam ḳhaar talak le aa.e
dil ke amraz ye dekha hai ki darman ke liye
ek bimar ko bimar talak le aa.e
rok paa.i na zaban bhi miri alfaz mire
valvale quvvat-e-iz.har talak le aa.e
asman ham ne bana.e the jo apni ḳhatir
ham jahan ko usi me.aar talak le aa.e
rah gaya mal ke samundar kaf-e-afsos aur ham
naav us paar se is paar talak le aa.e
tha hamen shauq-e-asiri na samajhna ye ‘nihal’
lu ke jhonke dar-o-divar talak le aa.e
Leave a Reply