Poet
agar ḳhud apne maratib se ashna ho jaa.e
zara si der men insan kya se kya ho jaa.e
na jaane kitne dilon se umanD paḌe aansu
ḳhuda kare ye mira saaz be-sada ho jaa.e
kisi kitab kisi rahnuma ki hajat kya
har ek naqs agar sher men rava ho jaa.e
ajiib rasm-e-zamana hai is ko kya kahiye
jo dusron ko mila.e vahi bura ho jaa.e
dil-o-nigah mukaddar hon jin ke chehre se
hamara un ka kahin phir na samna ho jaa.e
hamare ghar ki jo dushman bani hui hai abhi
chale hava to pareshan yahi ghaTa ho jaa.e
yaqin-e-lutf-o-karam aap agar dila.en use
‘nasir’ halqa-e-auham se riha ho jaa.e
Leave a Reply