jab bhi tiri qurbat ke kuchh imkan nazar aa.e
ham ḳhush hue itne ki pareshan nazar aa.e
dekhun to har ik husn men jhalken tire andaz
sochun to faqat gardish-e-dauran nazar aa.e
TuuTa jo fusun-e-nigah-e-shauq to dekha
sahra the jo nashshe men gulistan nazar aa.e
kanTon ke dilon men bhi vahi zaḳhm the lekin
phulon ne saja.e to numayan nazar aa.e
ik ashk bhi nazr-e-gham-e-janan ko nahin paas
ham aaj bahut be-sar-o-saman nazar aa.e
jo rah-e-tamanna ke har ik moḌ pe chup the
jab daar pe pahunche to ghazal-ḳhvan nazar aa.e
kya janiye kya ho gaya arbab-e-nazar ko
jis shahr ko dekhen vahi viran nazar aa.e
kya ruup nigahon men racha baiThe ki in ko
gulshan nazar aa.e na bayaban nazar aa.e
ik umr se is moḌ pe baiThe hain jahan par
ik pal ka guzarna bhi na asan nazar aa.e
‘sadiq’ ki nigahon ko hi Thahrav na mujrim
a.ine har ik daur men hairan nazar aa.e
Leave a Reply