Zahida Zaidi
main ki la-intiha vaqt ki rahguzar par
sirf ik lamha-e-mukhtasar
main ki ehsas-o-afkar ke bahr-e-zakhkhar men
sirf ik qatra-e-muztarib men ki sahra-e-hasti ki tapti hui ret par
sirf ik zarra sar-nigun
main ki ik vusat kaenat-e-hasin men
sirf ik nuqta-e-be-sukun
main vo qatra ki jis men samundar ki betabiyan maujzan hain
vo lamha jo mustaqbil-o-hal-o-mazi ka aaina hai
main vo nuqta ki jo gardish-e-dahr ka ashna hai
main vo zarra ki sahra-e-hasti ki tishna-labi
apne dil men chhupae
main vo ik jism-e-nazuk ki jo
nasl-e-insan ke dard aur isyan ka bar-e-garan
apne sar par uthae
main vo ik chashm-e-pur-shauq jis ke liye vusat-e-dasht-o-sahra bhi kam thi
main ne phir chand taron par daali kamanden
asmanon ke vo jagmagate makin
is anokhi jasarat pe sab muskurae
main ki khud mahram-e-zauq-e-parvaz
hamraz sar-e-bulandi
chand taron ki mahfil se nazren churae
main ki khud saghar-e-shauq
paimana-e-jazb-o-masti
halqa-e-mai-gusaran se daman bachae
main ki khud jurat-e-ehtiram-e-did
khud jurat-e-ehtiram
sirf ik jurat-e-arzu par pasheman
main ki khud saare aalam ke dard-o-alam ki amiin
apne zakhmon ke atish-navai pe khandan
main ki har raz-e-sar-basta se ashna
main ki ahang-e-hasti ki hamraz huun
main huun sadiyon ki khoi hui ik sada
main anasir ka tuuta hua saaz huun
Leave a Reply