ma.arke men ishq ke sar se guzarne se na Dar
gar uThata hai to ye jokhon to marne se na Dar
jan-e-man tera gareban-gir ho sakta hai kaun
ashiqon ke ḳhuun men tu daman ke bharne se na Dar
zahida tu sohbat-e-rindan men aaya hai to sun
tark gaali ka na kar pagḌi utarne se na Dar
gar subuk-bari ki ḳhvahish hai to us qatil se phir
zindagi ik bojh hai sar ka utarne se na Dar
us ke har halqe men hain dil se pareshanon ke saath
ye na kah hamdam ki zulf us ki bikharne se na Dar
us ke kuche men qadam rakhte hue kaTta hai sar
sar ko rakh le haath par aur paanv dharne se na Dar
dil diya tu ne ‘muhib’ ab ḳhauf hai kis chiiz ka
do-do baten zehn se jis vaqt karne se na Dar
Leave a Reply