Dhundte Kya Ho In Aankhon Mein Kahani Meri

DhunDte kya ho in ankhon men kahani meri

khud men gum rahna to aadat hai purani meri

bhiid men bhi tumhen mil jaunga asani se

khoya khoya hua rahna hai nishani meri

main ne ik baar kaha tha ki bahut pyasa huun

tab se mashhur hui tishna-dahani meri

yahi divar-o-dar-o-bam the mere hamraz

inhi galiyon men bhatakti thi javani meri

tu bhi is shahr ka baasi hai to dil se lag ja

tujh se vabasta hai ik yaad purani meri

karbala dasht-e-mohabbat ko bana rakkha hai

kya ghazal-goi hai kya marsiya-khvani meri

dhime lahje ka sukhnavar huun na sahba huun na josh

main kahan aur kahan shoala-bayani meri

Leave a Comment