kisi ka ek hai dushman to dost-dar hai ek
hamara hijr adu ek vasl yaar hai ek
jahan men shadi o gham se nahin hai duur koi
khizan adu hai mira ek aur bahar hai ek
khushi nasib nahin ham ko ta-ba-hashr koi
hazar ranj hain ek aur ye dil-figar hai ek
bisan-e-marg-o-hayat ahl-e-dil ko aalam men
hamesha ek hai dil jis pe gham savar hai ek
mila hai husn-e-khuda-dad jin ko aalam men
fida jo ek hai un par to jan-nisar hai ek
rah-e-vafa men ye hai haal ashiqon ka mudam
kharab ek hai shorida-sar to khaar hai ek
miloge ham se jo ‘miskin’ dui ko duur karo
shumar ek hai gar dam hai do pe taar hai ek
Leave a Reply