Rais Amrohvi
buland-o-past men manzil hamen kahin na mili
jo asman se nazil hue zamin na mili
gila nahin ki tira sang-e-astan na mila!
ye hai ki dida-e-tar ko vo astin na mili
kabhi jo shana-e-uqda-kusha nasib hua
to us ki zulf-e-girah-gir o ambarin na mili
baja ki jan-e-zuleḳha the misr men yusuf
magar jo baat thi kan.an men vo kahin na mili
mile jo arsh pe ḳhuld-e-barin to kya hasil?
ki is zamin pe hamen jannat-e-zamin na mili
‘ra.is’ daad ḳhudavand-e-afrinash ko!
agar mili to ba-juz harf-e-afrin na mili
Leave a Reply