kaisi ashufta-sari hai ab ke
kuchh ajab be-ḳhabari hai ab ke
dekh kar ahl-e-gulistan ka chalan
jaan hathon men dhari hai ab ke
shahr ka amn-o-sukun hai anqa
kaisi ye fitnagari hai ab ke
mausam-e-fasl-e-ḳhizan hai phir bhi
shaḳh-e-dil apni hari hai ab ke
kor chashmon ko ḳhuda hi samjhe
da.ava-e-dida-vari hai ab ke
Dar yahi hai ki kahin TuuT na jaa.e
shaḳh phulon se bhari hai ab ke
pichhle salon se ziyada ai ‘shauq’
ranj-e-be-bal-o-pari hai ab ke
Leave a Reply