Poet
zanjir-e-intizar se mujh ko riha kare
ab ke baras to aan mile vo ḳhuda kare
ik aur iinT gir ga.i divar-e-umr ki
har roz mujh se Dubta suraj kaha kare
aate hain aur log kudalen sambhal kar
minara-e-badan se kaho aasra kare
jab doston ke rabte bhi dushmanon se hon
mushkil paḌe to kis se koi mashvara kare
kamzor huun par itna bhi kamzor main nahin
dushman bhi raat din mire haq men dua kare
jo aap devta vatan-e-sha.iri ka ho
mujh aisa kam-hunar use hairan kya kare
guzre hue din ek dafa aa.e hain zarur
nasir bashir dil se kaho hausla kare
Leave a Reply