Bazm Se Jab Nigar Uthta Hai

Jaun Eliya

bazm se jab nigar uthta hai

mere dil se ghubar uthta hai

main jo baitha huun to vo khush-qamat

dekh lo baar baar uthta hai

teri surat ko dekh kar miri jaan

khud-bakhud dil men pyaar uthta hai

us ki gul-gasht se ravish-ba-ravish

rang hi rang yaar uthta hai

tere jaate hi is kharabe se

shor-e-girya hazar uthta hai

kaun hai jis ko jaan aziiz nahin

le tira jan-nisar uthta hai

saf-ba-saf aa khade hue hain ghazal

dasht se khaksar uthta hai

hai ye tesha ki ek shoala sa

bar-sar-e-kohsar uthta hai

karb-e-tanhai hai vo shai ki khuda

aadmi ko pukar uthta hai

tu ne phir kasb-e-zar ka zikr kiya

kahin ham se ye baar uthta hai

lo vo majbur shahr-e-sahra se

aaj divana-var uthta hai

apne yaan to zamane valon ka

rose hi eatibar uthta hai

‘jaun’ uthta hai yuun kaho yaani

‘mir’-o-‘ghalib’ ka yaar uthta hai