Poet
faza men da.ere bikhre hue hain
ham apni zaat men uljhe hue hain
hazar ḳhvahishon ke but hain dil men
magar but bhi kabhi sachche hue hain
shanasa.i mohabbat bevafa.i
ye sab koi mire dekhe hue hain
hai un ka zikr itna mahfilon men
ham apni dastan bhule hue hain
hui hai sabt un par mohr-e-alam
vahi jo faisle dil se hue hain
ye dil jab tak zara Thahra hua hai
usi ke dam se ham Thahre hue hain
jalao dil ki har saaya ho raushan
andhere chain se baiThe hue hain
jo aansu vaqt-e-ruḳhsat the amanat
vo ab tak ruuh men taire hue hain
bahut logon ne ki hai dard-mandi
magar ye zaḳhm kab achchhe hue hain
guzar jaate na jaane kitne tufan
ye do ankhen unhen roke hue hain
Leave a Reply