Karwan Walon Ne Kho Di KHud Hi Apni Aabru

karvan valon ne kho di ḳhud hi apni aabru

laila-e-mahmil-nashin ko pa-ba-jaulan laa.e hain

qais ki ghairat ka milta hi nahin koi suragh

kuchh bagule DhunD kar sahra-ba-sahra aa.e hain

Das liya hai raushni ne de ke javon ka fareb

saanp kitne us ke ujle ruup men lahra.e hain

aa.ine TuuTe hain kitne dekh kar un ka jamal

aap apni arzu-e-husn par sharma.e hain

kaun jaane ho chuke maslub kitne ashk-e-gham

kitni fariyadon ke dil husn-e-talab ne Dhaa.e hain

kitni zanjiron ke halqe payalon men Dhal ga.e

shabnami ankhon men raqsan bebasi ke saa.e hain

‘baḳht’ shikva kya karen ahl-e-sitam ke jaur ka

ahl-e-dil ne giit marg-e-abru par gaa.e hain