is shash-jihat men khuub tiri justuju karen
kaabe men chal ke sajda tujhe char-su karen
ashiq jo husn-e-pak men kuchh guftugu karen
daman ka pichhe naam len pahle vazu karen
sharminda huun zamin men gaden surkh-ru karen
ustadgi jo sarv tire ru-ba-ru karen
paida karen jo tujh ko unhin ko hai dastaras
pamard hain vahi jo tiri justuju karen
le ja chuki chaman men saba bu-e-zulf-e-yar
sumbul ke silsile ko bhi barham vo mu karen
afsana-goi afi-e-gesu-e-yar men
khamosh hon charagh jo ham guftugu karen
divangi ka silsila jaave na haath se
daman ko phadiye jo gareban rafu karen
ai badshah-e-husn faqiron ki tarah se
ashiq dua-e-khair tujhe ku-ba-ku karen
didar-e-am kijiye parda uthaiye
ta-chand banda-ha-e-khuda aarzu karen
masti men mujh se be-adabi hogi yaar se
mujh ko gunah-gar na jam-o-subu karen
divan-e-husn men se hui hai ye intikhab
ashiq-mizaj sair-e-bayaz-e-gulu karen
vird-e-zaban hai roz-o-shab in ki sana-e-husn
shayan hai jis qadar ki ye shaer ghulu karen
likh dete hain hasinon ko ham khatt-e-bandgi
mashq-e-sitam ko tark jo ye tund-khu karen
hairan-kar huun tire rukhsar-e-saf ka
sakta ho aaina jo tire ru-ba-ru karen
murgh-e-chaman hon zamzama-paira bahar aai
hangama garm shefta-e-rang-o-bu karen
tasir-dar log hain allah ke faqir
sang-e-sanam hon aab jo ham zikr-e-hu karen
maujud go ki tu hai magar chahta hai shauq
avara hon talash tiri chaar su karen
‘atish’ ye vo zamin hai ki jis men ba-qaul-e-‘dard’
dil hi nahin raha hai jo kuchh aarzu karen
Leave a Reply