abdul-ahad-saaz

Nani-Aman Ki Wafat Par Ek Nazm

aaj bachpan ko dafn kar aae

mohni jhurriyan subuk ankhen

mehrban shafqaton se pur chehra

thapkiyan dete haath narm aghosh

chahaten dekh-bhal pyaar dular

saare kumbe ki fikr sab ka khayal

rabte rishte-dariyan naate

khatiren vaza-dariyan mehman

martabe haisiyat hisab-nisab

nazm-o-tartib ghar ke ikhrajat

maut mayyat byaah paidaish

taaziyat tahniyat ke chal-chalan

chhutti a.shura iid aur barat

har bade chhote din ka pas-o-lihaz

roze naflen vazife tasbihen

sadqa minnat murad pir-faqir

khair-khairat bakhshishen nazren

lag-lag len-den mel-milap

puchh-gachh rakh-rakhav rit-rivaj

raunaqen khush-kalamiyan adab

raat qisse kahaniyan chuhlen

mez almari pandan palang

zaiqe rang khushbuen chehre

in mohallon ka khushnuma mahaul

in gharon ki rivayati tahzib

aaj ik daur jaise Duub gaya

aaj tifli ka saath chhut gaya

aaj bachpan ko dafn kar aae

More Poems

Leave a Comment