Poet
tire yaqin ke qabil agar nahin to na ho
jo dastan-e-vafa mo’atabar nahin to na ho
hazar ranj uTha kar bhi muskura.enge
hayat-e-ishq agar muḳhtasar nahin to na ho
bahar aa.e to kyun-kar qafas men chain paḌe
agar kisi ko gham-e-bal-o-par nahin to na ho
ab uTh ke jaa.en kahan but-kade ki raah hain ham
ye rasta bhi tiri rahguzar nahin to na ho
gham-e-hayat ka shikva bhi kuchh nahin hai mujhe
jo mere haal ki un ko ḳhabar nahin to na ho
unhen main va.ada-faramosh kah nahin sakta
madar-e-zist is ummid par nahin to na ho
mujhe to manzil-e-maqsud tak pahunchna hai
rah-e-vafa men koi ham-safar nahin to na ho
nahin hai naaz mujhe apni sher-goi par
mire kalam men fikr-o-nazar nahin to na ho
naved-e-marg mubarak ḳhusha ye hijr ki raat
mire nasib men ‘nudrat’ sahar nahin to na ho
Leave a Reply