rah-e-vafa men saya-e-divar-o-dar bhi hai
lekin usi pe jaan se jaane ka Dar bhi hai
vaqfa hai zindagi to faqat chand roz ka
phir shahr-e-rang-o-bu ki taraf ik safar bhi hai
raushan rakho charagh lahu se tamam shab
har raat ke nasib men aḳhir sahar bhi hai
kirdar dekhne ki rivayat nahin rahi
ab aadmi ye dekhta hai mal-o-zar bhi hai
sun to rahe ho baat yuun vaa.iz ki ghaur se
lekin yaqin us ki kisi baat par bhi hai
daman-e-gul-ruḳhan ki tamanna bhi dosto
kitna hasin ḳhvab hai tum ko ḳhabar bhi hai
mera bayan-e-shauq bhala ra.egan ho kyuun
tahrir men nihan mira ḳhun-e-jigar bhi hai
yuun to koi aziiz hain aur dost bhi magar
‘shayan’ ye batao koi mo’atabar bhi hai
Leave a Reply