ai ḳhuda jab se ata ki tu ne peshani mujhe
sar uThane men hui hai kitni asani mujhe
apne dil men hi basa rakkhi hai main ne ka.enat
koi kah sakta nahin ab naqsh-e-virani mujhe
aise vahshat-nak manzar mujh men aate hain nazar
ab nahin hoti kisi par koi hairani mujhe
sainkaḌon sadiyon se sahra ki sada ke saath huun
raas aa sakti nahin dariya ki sultani mujhe
us taraf hi chal paḌunga sochne ka kya maqam
jis taraf le ja.egi ye rah-e-anjani mujhe
Leave a Reply