Koi Ojhal Duniya Hai

lamha lamha roz-marra zindagi ke saath hai

ek lamha jo kisi aaise jahan ki zindagi ka haath hai

jis men main rahta nahin jis men koi rahta nahin

jis men koi din nahin hai raat ka pahra nahin

jis men sunta hi nahin koi na koi baat hai

roz-marra zindagi se yuun guzarta hai kabhi

saath le jaata hai guzri umr ke hisse kabhi

jo basar ab tak hua us ko ghalat karta hua

aur hi ik zindagi se ashna karta hua

jo guman tak men na tha us ko dikha jaata hua

vahm tak jis ka na tha us vaqt ko laata hua

phir chala jaata hai apne asl ke asar men

aur ham masruf ho jaate hain phir

apne roz-o-shab ke karobar men

Leave a Comment