Dattatriya Kaifi
husn-e-azal ka jalva hamari nazar men hai
jo tuur par hua tha dil-e-dida-var men hai
dair o haram men kis liye avara-gardiyan
jis ki tujhe talash hai vo dil ke ghar men hai
jo dekhne ki aankh hai tujh ko nahin mili
vo nuur qad men varna shajar men hajar men hai
ḳhamoshiyon men mahfil-e-anjum ki us ko dekh
hangama-mast kyuun tu numud-e-sahar men hai
dekha hai aur phir nahin aaya nazar tujhe
vo husn vo jalal jo shams o qamar men hai
us ko natije illat-e-gha.i ki is ko dhun
farq is qadar hi be-ḳhabar o ba-ḳhabar men hai
DhunDa hai jis ne us ne hi paaya suna nahin
likkha hua ye hukm qaza-o-qadar men hai
haan haan ḳhuda ḳhuda hi hai aur hai bashar bashar
is uqde ka jo hal hai vo qalb-e-bashar men hai
vo bhi to hain nazara-e-kul juz men hai jinhen
poshida raz-e-did to husn-e-nazar men hai
hai ishq juzv-e-la-yatajazza yaqin jaan
ye qimat-e-majaz-o-haqiqat ḳhatar men hai
kya shauq-e-did tujh pe to ghalib hai lutf-e-did
jo baat tere dil men hai apni nazar men hai
nikle na phans ke gesu-e-pur-pech-o-ḳham se dil
sahil pe ḳhaak pahunche jo kashti bhanvar men hai
ulfat hai kis ki kaisi mohabbat kahan ka ishq
ma.adum tu to fikr-e-dahan-o-kamar men hai
naqis thi ibtida to hai anjam-e-ishq bhi
be-rabti mubtada men jo thi vo ḳhabar men hai
‘kaifi’ masih-e-sher hain ahbab aur bhi
ik tujh se jan-e-taza nahin is Dhachar men hai
Leave a Reply