Sar-e-Asman Sar-e-Zamin

Ahmad Hamesh

maalum nahin kya hua ki jins mohabbat pe haavi ho gai

goya mohabbat haar gai aur jins jiit gai

jo haath haath men paivast ho sakte the

vo haath kahan hain

jo haath ko thame kuchh duur chal sakte the

kya un hathon ko tod diya gaya

vo haath kahan gae jo nazm likhte the

vo haath kahan gae jo asman ko zamin par utaar sakte the

kaun kab kahan

phenka gaya

aur ab to jugnuon se bhare jangal men maan akeli hai

ek jugnu bhi nahin jo raushni ko hisar kare

aur maan ko us ke jilau men le aae

ab itna samay nahin ki

asman ya zamin use bosa den