Ek shaKHs Jawan KHak-Basar Yaad to Hoga

Nihal Sevharvi

ik shaḳhs javan ḳhak-basar yaad to hoga

vo apni nigahon ka asar yaad to hoga

vo dhuum zamane men mire josh-e-junun ki

vo ghalghala-e-sham-o-sahar yaad to hoga

bhule to na hoge vo tajalli ki hikayat

vo tazkira-e-dagh-e-jigar yaad to hoga

har gaam pe vo husn ki pur-hosh nigahen

vo ishq ka bad-mast safar yaad to hoga

har lamha vo duniya-e-mohabbat men taghayyur

har saans men vo rang-e-digar yaad to hoga

vo dil ko tire husn-e-ḳhud-ara se ta.alluq

vo ḳhaak se paiman-e-nazar yaad to hoga

vo kargah-e-dahr se ik be-ḳhabari si

vo ta.ana-e-har-ahl-e-ḳhabar yaad to hoga

vo diid ki tha ru-kash-e-ara.ish-e-giti

pahron taraf-e-rah-guzar yaad to hoga

vo ishq ke jazbat ka bharpur talatum

tufan ki maujon men guzar yaad to hoga

gum-karda sukun pa ke mujhe apni gali men

kahna vo tajahul se kidhar yaad to hoga

bholi to na hogi miri ulfat ki haqiqat

muddat ka fasana hai magar yaad to hoga