mauj-e-ḳhayal-e-yar gham-e-asar aa.i hai
kyuun chahaton ke biich ye divar aa.i hai
ik buund haath aa.i hai patthar nichoḌ kar
ankhon se lab pe quvvat-e-iz.har aa.i hai
ham dushmanon men apni zaban haar aa.e hain
jab haath kaT chuke hain to talvar aa.i hai
kyuun asman ne dast-e-tahi phir kiya daraz
kyuun dhuup zer-e-saya-e-divar aa.i hai
suraj jhulas gaya hai har ik shaḳh-e-jism-o-jan
din Dhal gaya to ghar men shab-e-tar aa.i hai
be-saut tha ‘mujibi’ har ik naghma-e-ḳhayal
TuuTa jo dil to saaz ki jhankar aa.i hai
Leave a Reply