Rahman Hafeez
charagh aankh ki sab boliyan samajhte hain
ye ham se puchh jo aisi zaban samajhte hain
baha ke le gaya sab ḳhadd-o-ḳhal ahd-e-shabab
ham a.ine ko bhi ab-e-ravan samajhte hain
hamen azal se mohabbat sikha.i jaati hai
ham ahl-e-harf yahi ik zaban samajhte hain
jahan yaqin ke tajassus ki aankh band na ho
use ilaqa-e-vahm-o-guman samajhte hain
uTha chuka hai takallum tamam parde magar
ham an-kahi ko abhi darmiyan samajhte hain
tabah ki ga.i duniyaon ka ghubar na ho
ham ahal-e-ḳhak jise kahkashan samajhte hain
hamara bojh kisi aur ne uThaya nahin
to ham bhi kya use bar-e-garan samajhte hain
Leave a Reply