almari se khat us ke purane nikal aae
phir se mire chehre pe ye daane nikal aae
maan baith ke takti thi jahan se mira rasta
mitti ke hatate hi khazane nikal aae
mumkin hai hamen gaanv bhi pahchan na paae
bachpan men hi ham ghar se kamane nikal aae
ai ret ke zarre tira ehsan bahut hai
ankhon ko bhigone ke bahane nikal aae
ab tere bulane se bhi ham aa nahin sakte
ham tujh se bahut aage zamane nikal aae
ek khauf sa rahta hai mire dil men hamesha
kis ghar se tiri yaad na jaane nikal aae
Leave a Reply