pTriyon Ki Chamakti Hui Dhaar Par Fasle Apni Gardan kaTate Rahe

Yusuf Taqi

pTriyon ki chamakti hui dhaar par fasle apni gardan kaTate rahe

duriyan manzilon ki simaTti rahin lamha lamha vo nazdik aate rahe

zinda machhli ki shayad taḌap thi unhen saare bagule samundar ki janib uḌe

ret ke zard kaghaz pe kuchh soch kar naam likh likh ke tera miTate rahe

narm chahat ki phaili hui ghaas ko vaqt ke saḳht patthar na raunden kahen

bas yahi ḳhauf apni nigahon men tha muskurane ko ham muskurate rahe

chilchilati hui dhuup ki aanch men yuun jhulasna to apna muqaddar raha

zehn men narm-o-nazuk ghani chhanv se tere anchal magar sarsarate rahe

yaas ki ḳhushk Tahni pe kaise laga baur ḳhvabon ka mujh se na kuchh puchhna

zindagi lamha lamha mujhe mil ga.i qatra qatra vo chahat luTate rahe