Sulaiman Jazib
haqiqat bhi lagne lagi hai kahani
mujhe kha ga.i hai miri ḳhush-bayani
nahin yaad mujh se mila tha kabhi vo
vagarna use yaad hai har kahani
koi yaar bairi na apna agar ho
to ye zindagi hai faqat ra.egani
bas ik call par hi chale aa.e ho tum
navazish karam shukriya mehrbani
yahan dur-o-nazdik shahr-e-butan hai
kisi ko nahin dil ki halat batani
umaD aaya dil aise ankhon men ‘jazib’
ki yakja hon jaise kahin aag paani
Leave a Reply