Habib Jalib
jagne vaalo ta-ba-sahar ḳhamosh raho
kal kya hoga kis ko ḳhabar ḳhamosh raho
kis ne sahar ke paanv men zanjiren Dalin
ho ja.egi raat basar ḳhamosh raho
shayad chup rahne men izzat rah jaa.e
chup hi bhali ai ahl-e-nazar ḳhamosh raho
qadam qadam par pahre hain in rahon men
dar-o-rasan ka hai ye nagar ḳhamosh raho
yuun bhi kahan be-tabi-e-dil kam hoti hai
yuun bhi kahan aram magar ḳhamosh raho
sher ki baten ḳhatm huiin is aalam men
kaisa ‘josh’ aur kis ka ‘jigar’ ḳhamosh raho
Leave a Reply