Aal E Ahmad Suroor
khuda-parast mile aur na but-parast mile
mile jo log vo apne nashe men mast mile
kahin khud apni durusti ka dukh nahin dekha
bahut jahan ki durusti ke bandobast mile
kahin to khak-nashin kuchh buland bhi honge
hazaron apni bulandi men kitne past mile
ye sahl fath to phiki si lag rahi hai mujhe
kisi aziim muhim men kabhi shikast mile
ye shakh-e-gul ki lachak bhi payam rakhti hai
basan-e-tegh the jo ham ko haq-parast mile
suna hai chand tahi-damanon men zarf to tha
‘surur’ ham ko tavangar bhi tang-dast mile
Leave a Reply