baja ki kashti hai paara paara thapeḌe tufan ke kha raha huun
magar ye e.azaz kam nahin hai ki aap hi apna naḳhuda huun
kabhi to main ne dhunak diye hain pahaḌ bhi apne raste ke
kabhi main ḳhud apne raste ki muhib divaren ho gaya huun
mujhe hai shab-ḳhun ki fikr lekin unhen halakat ka Dar nahin hai
mire qabile ke log sote hain aur shab-bhar main jagta huun
miri haqiqat tazad ki is girah ke khulne pe munhasir hai
main vaqt ka huun jalil ḳhusrav main ahd ka be-nava gada huun
ye baat alag hai ki ghuncha ghuncha mire chalan se chaTak raha hai
saba ka jhonka huun gulistan se main be-sada sa guzar raha huun
jahan ka sheva sitam tha lekin mujhe vafa se rahi hai nisbat
jahan ghalat tha ki main ghalat tha ye baat rah rah ke sochta huun
miri jabin ka chamakta suraj mire jilau men sada raha hai
main raat ki zulmaton ko ‘arif’ azal se lalkarta raha huun
Leave a Reply