Komal Joya
ai rasm-e-baghavat ke giraftar sipahi
likkhi thi tire bakht men ye haar sipahi
us taaj ke aur takht ke dushman hain hazaron
maamur hifazat pe hain do-char sipahi
ik tasht men rakkhi hui farman-ravai
ik tasht men hain dirham-o-dinar sipahi
malka huun mahal ki main mira hukm-e-mohabbat
auqat kahan teri ki inkar sipahi
kuchh vaqt ki qurbat ke liye laut raha hai
tankhvah men chhutti ka talabgar sipahi
zindan ki divar pe likkhe rahe nauhe
zanjir patakhta raha bimar sipahi
khat chuum ke ankhon se lagate hue ‘komal’
roya tha bahut tuut ke har baar sipahi
Leave a Reply