Rasheed Lakhnavi
hai be-ḳhud vasl men dil hijr men muztar siva hoga
ḳhushi jis ghar ki aisi hai vahan ka ranj kya hoga
abhi to yaar se kahne ki dil men baten hain lakhon
na kuchh yaad aa.ega us vaqt jis dam samna hoga
mire madfan ki miTTi ka vo khichva.enge itr aksar
agar bu-e-vafa ka un ke dil men kuchh maza hoga
vo gesu baḌhte jaate hain bala.en hoti hain nazil
qadam tak aa ga.e jab hashr aalam men bapa hoga
ghazab karte ho mere dil ko abru se chhuḌate ho
bhala samjho to kyunkar gosht naḳhun se juda hoga
adam men mera kya kya dam rukega ek muddat tak
na.i basti na.i poshak hogi ghar naya hoga
utara ḳhuun ke dariya se hoga sarfaroshon ka
banegi tegh kashti aur qatil naḳhuda hoga
bayan tha roz-e-avval ye mire dil ki udasi ka
baḌi us ghar ki abadi ye hai matam-sara hoga
ḳhabar le baghban hai kis ghazab ka habs gulshan men
hava hai band asiran-e-qafas ka dam ruka hoga
mire siine se dil ke TuTne ki kyuun sada aa.i
magar yaan haath se saaqi ke shisha gir paḌa hoga
sitamgar aa.ega aksar ḳhabar lene ko zindan men
hamen vo beḌiyan pahna ke paband-e-vafa hoga
raqibon ki umidon ko jagah dete hain dil men ham
ki un men se koi aḳhir hamara mudda.a hoga
nahin hai jis men tera ishq vo dil hai tabahi men
vo kashti Duub ja.egi na jis men naḳhuda hoga
‘rashid’ ulfat se jab vaqif na the aksar ye kahte the
na dil se ham juda honge na ham se dil juda hoga
Leave a Reply