dagh-e-dil hain ghairat-e-sad-lala-zar ab ke baras
ba.ad muddat ke hai phir josh-e-bahar ab ke baras
abiyari se tiri ai tegh-e-yar ab ke baras
taḳhta-e-gul hai hamara jism-e-zar ab ke baras
ta-ba-daman hai gareban taar taar ab ke baras
TuTte hain talvon men chubh chubh ke ḳhaar ab ke baras
hai ye zor-e-amad-e-fasl-e-bahar ab ke baras
mast hain zahid bhi misl-e-bada-ḳhvar ab ke baras
ulfat-e-saqi ne lo zahid ko bhi khincha idhar
daur-e-mai ka sub.ha par hoga shumar ab ke baras
fasl-e-gul men ba.ad-e-murdan bhi hua josh-e-junun
sang-e-tiflan se ho tarmim-e-mazar ab ke baras
shishe men pinhan hai mai aur dil men zauq-e-mai-kashi
aate hi saaqi ke ai abr-e-bahar ab ke baras
saqiya ainak chaḌhe hon ranj-o-gham bala-e-taq
bada-e-di-sala ka shisha utaar ab ke baras
zulm par bandhi hai phir sayyad-o-gulchin ne kamar
qaid-e-bulbul ki hai gulshan men pukar ab ke baras
aarzu hai ba.ad-e-murdan bhi rahun sairab-e-mai
sarf-e-jam-o-ḳhum karen mera ghubar ab ke baras
josh-e-ḳhun-e-bulbul-e-shaida ka paida ho asar
le agar fasd-e-rag-e-gul nok-e-ḳhar ab ke baras
julte hain dil bulbulon ke ashiyan ki tarah se
atish-e-gul ki hai gulshan men pukar ab ke baras
qismat apni apni hai achchha mubarak ho ‘habib’
ḳhar-e-gham ham ko tumhen pahlu-e-yar ab ke baras
Leave a Reply