Aaj Un Par Raaz-E-Dil Ifsha Karen

aaj un par rāz-e-dil ifshā kareñ

husn ko maġhrūr-o-ḳhud-ārā kareñ

chand din un ko na ab dekhā kareñ

ya.anī kuchh un ko bhī taḌpāyā kareñ

is tarah ho yuuñ kareñ aisā kareñ

un se milne kā koī chārā kareñ

aap to jo kuchh kareñ achchhā kareñ

ham kaheñ to shikva-e-be-jā kareñ

maut bhī māñge se miltī hai kahāñ

phir ye kyūñkar ho ki vo aayā kareñ

vo abhī aa.eñ chale jaa.eñ abhī

ghar ko vo gulshan kabhī sahrā kareñ

chāhne par aap ke mauqūf hai

aap chāheñ to abhī achchhā kareñ

ban sake un se na kuchh aa.e baġhair

apne dil meñ vo kashish paidā kareñ

‘sā.ib’ apne vaqt par aatī hai maut

zindagī se laakh uktāyā kareñ

Leave a Comment