aaj un par raz-e-dil ifsha karen
husn ko maghrur-o-ḳhud-ara karen
chand din un ko na ab dekha karen
ya.ani kuchh un ko bhi taḌpaya karen
is tarah ho yuun karen aisa karen
un se milne ka koi chara karen
aap to jo kuchh karen achchha karen
ham kahen to shikva-e-be-ja karen
maut bhi mange se milti hai kahan
phir ye kyunkar ho ki vo aaya karen
vo abhi aa.en chale jaa.en abhi
ghar ko vo gulshan kabhi sahra karen
chahne par aap ke mauquf hai
aap chahen to abhi achchha karen
ban sake un se na kuchh aa.e baghair
apne dil men vo kashish paida karen
‘sa.ib’ apne vaqt par aati hai maut
zindagi se laakh uktaya karen
Leave a Reply