havas miTti nahin ḳhauf-e-ḳhuda pamal rakhta hai
ajab sarkash hai dil mera ki hasb-e-hal rakhta hai
vahi ankhen hain jo ganj-e-giran-maya luTati thiin
vahi dil ab hai apne aap ko kangal rakhta hai
rifaqat koi majburi na apni thi na us ki thi
magar vo mere roz-o-shab ke sab ahval rakhta hai
barahna shaam dhundle aa.ine men jaise ghul jaa.e
kuchh aisa hi mira mahbub ḳhatt-o-ḳhal rakhta hai
bisat-e-jan ki baazi harta huun main vo shatir hai
ghazab ki chaal chalta hai ghazab ki chaal rakhta hai
ḳhuda tu hazir-o-nazir ḳhata.en baḳhshne vaala
yaqin hota nahin tu nama-e-a.amal rakhta hai
Leave a Reply