kahe to kaun kahe sarguzasht-e-aḳhir-e-shab
junun hai sar-ba-gareban ḳhirad hai mohr-ba-lab
hudud-e-shauq ki manzil se ta-ba-hadd-e-adab
hazar marhala-e-jan gudaz o sabr-talab
ye alam-e-qad-o-gesu ye husn-e-ariz-o-lab
tamam nik.hat-o-naghma tamam sher-o-adab
badal saka na zamana mizaj-e-ahl-e-junun
vahi dilon ke taqaze vahi nazar ki talab
hazar harf-e-hikayat vo ek nim-nigah
hazar va.ada-o-paiman vo ek jumbish-e-lab
thake thake se sitare dhuan dhuan si faza
bahut qarib hai shayad savad-e-manzil-e-shab
‘surur’ manzil-e-janan hai kab se chashm-ba-rah
bhaTak raha hai kahan karvan-e-shauq-o-talab
Leave a Reply