bazm-e-insan men bhi ik raat basar kar dekho
ek baar apni zamin par bhi utar kar dekho
is ufuq par na agar jannat-e-mauuda mili
is ufuq tak bhi jo chaho to safar kar dekho
koi Duubi hui kashti hai ki sahil ka nishan
apni sochon ke samundar se ubhar kar dekho
khud ko dekho mire meaar ke aine men
ik zara mujh pe ye ehsan bhi dhar kar dekho
mausam-e-gul hai to kirdar-e-chaman kyuun badle
aag phulon ko to shabnam ko sharar kar dekho
har zamane men bujhe to nahin rahte khurshed
gardisho aaj miri shab ko sahar kar dekho