ishq men koi zaman aur na makan hota hai
vo do-alam se alag ek jahan hota hai
kis qadar un ki tabi.at pe garan hota hai
jis fasane men vafaon ka bayan hota hai
shiddat-e-shauq ka allah re fusun uf re fareb
un ki nafrat pe mohabbat ka guman hota hai
sirf ik dil hi vo ma.abad hai vo ik ma.abad-e-ishq
jis men naqus ham-avaz-e-azan hota hai
un se is tarah juda ho ke ham aa.e hain ki haa.e
aankh se jaise koi ashk ravan hota hai
husn ke haq se koi ohda-bar-a kya hoga
ishq ka haq bhi ada ham se kahan hota hai
apni sozish men bhi hota hai jahannum mahsus
ghair ki aag ka sho.ala bhi dhuan hota hai
sunne vaale hi pe hai munhasir andaza-e-gham
varna jo haal hai vo kis se bayan hota hai
ghair ki aag men jalne ka maza hai kuchh aur
varna parvana bhi ḳhud sho.ala-ba-jan hota hai
haa.e is ishq men insan ka javan mar jaana
jaise kambaḳht isi din ko javan hota hai
saath har saans ke aata hai zaban par tira naam
dil men jo kuchh ho vahi vird-e-zaban hota hai
jis janaze pe barasti hui hasrat dekhun
us janaze pe mujhe apna guman hota hai
ishq men haa.e tabi.at ka vo aalam ‘bismil’
alam-e-ishq bhi jab dil pe garan hota hai
Leave a Reply