main sab kuchh an-dekha karne lagta huun
jab bhi us ka pichha karne lagta huun
ḳhud ke shane pe hi rakh deta huun sar
aise dil ko halka karne lagta huun
ḳhamoshi jab zahir hone lagti hai
tab main shor-sharaba karne lagta huun
naqsh-e-dast mila hai aur na naqsh-e-pa
kin rahon ka pichha karne lagta huun
vaj.h-e-hijr-e-yar ye duniya ho jaise
jis se dekho jhagḌa karne lagta huun
socha tha ki ishq nahin karna hai ab
aur pahle se ziyada karne lagta huun
ammi sukhi roTi yaad dilati hai
jab main paisa paisa karne lagta huun
jhagḌa to shiddat se kar leta huun phir
pachhtave men girya karne lagta huun
khol hi leta huun yadon ka album main
aur phir rona-dhona karne lagta huun
sar se dast-o-pa ka kaam liya main ne
main divana kya kya karne lagta huun
Leave a Reply